❞ بتتبسم قنوعة رغم ضهرها المحني من الهم اللي شايلاه ومن أحمال متتحمل واهي شايلة واهي ماشية ❝ 💬 في اقتباسات الكتب 📖

❞ أنا الولا حاجة وفقلبي متين حاجة..
أنا الضحكة اللي شايلاها نسيمة صبح بترفرف على شفايف بنت خمرية تشوفها تقول عجوز شقيانة واهي راضية!
بتتبسم قنوعة رغم ضهرها المحني من الهم اللي شايلاه ومن أحمال متتحمل واهي شايلة واهي ماشية ..
لأجل قوت العيش من الصبحية بتتضحك وتتمايل وتزرع حب فقلوب كل عين مارة لأن روحها صبية..
أنا الولا حاجة وفقلبي متين حاجة..
أنا الدمعة اللي نزلت ساعة الغربة تناجي شمسها قبل ما تفوتها وتغرب وتقلب نورها لضلمة ..
أنا الوحدة
أنا اللوعة
أنا الفرقة ..
فاتوني أهلي واحبابي
زرعت الحب وجنيته قسا وشوك يمزق قلبي..
والآه مُرة تمرر جوفي
ألم علقم ..
و أهو اليوم مَر
زي باقي الأيام مُر ..
وأنا استنى أناجي شمسي بدموعي ومفيش فايدة!
تسيبني كل يوم للضلمة والوحشة
ولا ترق
ولا تهوّن ..
ولا حتى تندّي عليا بنسيمة تبرد قلبي
وتنسم عليه ببسمة!
أنا الولا حاجة وفقلبي متين حاجة..
أنا الساكن فقضباني
أنا الساكت وعقلي بيصرخ ويقول كل أسراري..
أنا الدرويش فدنيا اللذة والكيف
فدنيا فيها كلاب السكك بقوا بهوات ومحترمين!
أنا العابد أطل بنوري وسط النار ..
وأطيب بدني بمسك الليل..
وأطير بجناحي فوق
وأطل وأقول
منين أنتم؟ ومين؟!...
أنا الولا حاجة وفقلبي متين حاجة..
أنا القلم اللي خط حروفه على كل سطر و كل لون ..
أنا اللي بقول..
ولسة هقول ..
أنا الولا حاجة.. .
#بقلمي
#منى_عبداللطيف
#خاطرة #زجل #شخبطة. ❝ ⏤منى عبد اللطيف