📘 ❞ ديوان زي الأفلام ❝ كتاب ــ أ:احمدمحمد ابراهيم محمد الحاج

❞ و اصلح غلطتي بغلطه
بتبقا ساعات كتير أكبر
بحل مشاكلي بمشاكل
و بهرب من الضغوط بضغوط
و طول الوقت مش زعلان
و طول الوقت مش مبسوط . ❝

❞ محتاج احد يكون انا..
يقسم معايا الدندنه...
يقسم معايا الصبح... النوم والكسل
مايكونش نقطه ضعف او سم في العسل . ❝

❞ انتي المختلفة الشفافة
الانثي الغامضة المتشافه
الطفلة الهادية الخوافة
والشيء الحلو إللى حصلي
انتي المتواضعه المغرورة
الساذجه الواثقة المكسورة
ابليس لو شافلك يوم صورة
يستغفر ربنا ويصلي . ❝

❞ البنت أن سكتت ف ده معناه
انها من جوا بتتألم
البنت بتبدأ ف المعاناة
اول ما تبطل تتكلم
البنت بطبيعتها بتسكت
اول ما بتعمل من حاجة
مين فينا ماقلش ف يوم ˝مالك˝
وحبيبته قالت له مفيش حاجه
اول ما تحس انها ساكته
أسأل نفسك قبل سؤلها
وقت ما هتراجع حساباتك
ممكن جدا تعرف مالها . ❝

❞ احنا نستاهل عقابنا
والظروف طلعت بريئة
احنا بعنا لبعض بعض
ماكانش م اللازم نبيع
ف الطبيعي ان احنا لما
نفترق نبدأ نضيع
الغريبة أنا لسه واقف
والحياة وقفت عليكي
وانتي عايشة الدنيا عادي
جنب واحد مش أنا
وانهارده بدأت أصدق
اني سايبك من سنة . ❝

❞ يا وطن بطبعه غريب . . من إمتي أنا بفهمك ؟
كان السمك رزقنا . . وبقينا رزق السمك . ❝

❞ كان راجل طيب وقريب من كل الناس
كان راجل طيب بس خلاص
يصعب ع الكافر يا جماعه
من كتر ما يومه ويتكرر
مبقاش بيركز ف الساعة
مقطوع من شجرة
ابنة إللى مسافر برا
او بنته اللي اصلا بيشوفها
ف الشهر أساسا كام مرة
ومراته اللي السرطان خدها
من ايده ف ظرف ٣ ايام
بقى أقصى طموحاته يشوفها
او ما يخش الأوضة ينام
والكرسي الهزاز والقعدة وكباية الشاي
الراجل من كتر الوحدة بقى شبه الناي
حضارتنا خلاص مبقتش تشوف
عكازه كمان مبقاش واحده
قاعد يتفرج ع الدنيا
ويشوف العالم من عنده
ولا حد أساسا بيزوره
وكأن حياته خلاص خلصت
وانتهى بالنسبة لهم دوره
كان راجل طيب لكن كان
فيه حد اتبقى معاه؟!لأه
اهو عاش طول عمره عشان غيره
واهو مات من وحدته ف الشقة . ❝

❞ الناس فانية يا محمد . . الشعر هو اللي بيعيش . . لو كتبت للناس شِعرك هيفني معاهم ، ومحدش هيفتكرك بحاجة بعد كدا . ❝