📘 ❞ لأ بطعم الفلامنكو ❝ كتاب ــ محمد طه اصدار 2019

التغيير يشبه المشي على الصراط.. أن تجتاز الجحيم، لتصل إلى جنة نفسك العامرة.

وعلى هذا الصراط، وفي هذه الرحلة.. هتعدي بمحطات مهمة وفارقة جداًّ.

محطة إنك تخرج عن النص القديم الموروث المتهالك.. اللي كتبه حد غيرك، وأصبح مش مناسب ليك.. وده اللي عملناه في كتاب (الخروج عن النص).

ومحطة إنك تكتشف كل العلاقات الخطرة اللي في حياتك، وتعالجها أو تنهيها فورًا.. وده اللي شفناه في كتاب (علاقات خطرة).

وتلات محطات كمان، هيقدمهم لك الكتاب ده.

الكتاب ده في الحقيقة، عبارة عن تلات كتب مدمجة في بعضها.. محتواها العلمي دسم ومكثف للغاية.. رغم إنها مكتوبة بلغة سهلة، ومفردات بسيطة.. كأني فعلا قاعد باتكلم معاك..

مش بس كده، الكتاب ده فيه أمثلة من حياتك، ونماذج من علاقاتك، وتمرينات نفسية مهمة، تقدر تعرف بيها احتياجاتك، وتكتشف عن طريقها مخاوفك، وتصدق بيها حقوقك، وتاخد من خلالها قراراتك الجديدة.

انتظرت سنتين كاملتين قبل ما انشر هذا الكتاب، علشان الحفر في النفس البشرية ليه احترام، والتوغل في أعماقها ليه قدسية، ومن حق القراء هدنة نفسية مناسبة لالتقاط الأنفاس، واستعادة التوازن، بعد جرعة (الخروج عن النص)، و(علاقات خطرة) الثقيلة، اللي كانت محتاجة وقت علشان تتبلع وتتهضم وتفيد، وتتحول إلى تصرفات وسلوك يومي عند كل من تناولها.

نصيحتي إنك تقرا الكتاب ده على مهل، وبجرعات مناسبة، دون تعجل، أو حماس زائد..

وبعد ما تقراه..
أقف على الأرض بكل هدوء..
وارفع رجلك من عليها بكل ثقة..
ونزّلها بكل ما تملك من قوة..
في ضربات إيقاعية متتابعة..
واسمع من جواك..
الصوت المبهر..
لأول (لأ)..
بطعم الفلامنكو..