❞ دا أنا بستلف على ماهيتي مرتين علشان امشي حالي ❝ 💬 في اقتباسات الكتب 📖

قراءة المزيد .. ❞ كان عمنا محمود السعدني مسجون في سجن الواحات .. وكان الضباط يخلوه يقعد معاهم بدل ما يشقى في الجبل علشان دمة خفيف طبعا !
وفي يوم من الأيام قام الشاويش "متى" يجري وراه وهو بيقول .. والمسيح لأكسر لك رأسك !
وبعد ما حل المساجين الموضوع , اتضح ان سبب الخلاف هذا الحوار اللي دار بين الشاويش متى و عمنا محمود السعدني !

- السعدني حب يعرف ليه الشاويش زعلان ومهموم بعد عودتة من الأجازة .
- الشاويش : اصل الواد ابني اخد الأعدادية .
- السعدني : طيب ودي حاجة تزعل يا حضرة الصول ؟ دا ابنك يبقى عبقري .
- الشاويش : اصل اللي مدايقني يا سعدني ان الواد عايز يكمل تعليمه والحال زي ما انت عارف ع القد ! .
- السعدني : يا راجل واحد عبقري زي ابنك لازم يكمل تعليمه وأهو التعليم مجاني وربنا يساعدك لحد ما يأخد التوجيهية.
-الشاويش : طيب وبعد الثانوية يا سعدني يروح فين ؟
- السعدني : يروح الجامعة يا حضرة الصول .
- الشاويش : جامعة ايه انت الاخر .. هو انا معايا فلوس ! دا أنا بستلف على ماهيتي مرتين علشان امشي حالي .. تقوللي يروح الجامعة !؟
- السعدني : طبعاً يروح الجامعة واد عبقري زي ده لازم يروح الجامعة ويخش كلية طب او هندسة او حتى حقوق او اداب ويبقى مثقف ! .
- الشاويش : مثقف ! يا فرحتي .. طب وبعد كده !؟

- السعدني : يجي معانا هنا يا شاويش ! (السجن) ههههههههههه
واشار السعدني للمساجين وقال : اهم كل اللي انت شايفهم دول جم هنا علشان مثقفين ! . ❝