❞ حازم الوو خير ياعمى فى ايه؟ ❝ 💬 في اقتباسات الكتب 📖

❞ بقولك يا فتحى شوفلى بيعه للبيت اللى على أول الشارع عايز أخلص منه.
فتحى ماليش صالح ياعم بعد آخر مره مفيش حد بيعرف يقعد فيه والناس بتتخانق معايا البيت ده فيه عفاريت كل اللى اشتروا ما عرفوش يقعدوا فيه واتهمونى بالنصب.
حازم عفاريت إيه بس ما عفريت إلا بنى ادم.هما اللى جبناء.
فتحى ولما هو مفيهوش عفاريت ما تروح أنت تقعد فيه ولا أنت خايف.
حازم هخاف من إيه بس ما أنا عندى بيت لكن البيت ده ورثته عن عمى بعد لما مات هو وعائلته كلهم.
فتحى مات برضوا ولا حاجه تانية ؟
حازم حاجه إيه ما تقعد عوج وتتكلم عديل يا فتحى.
فتحى لا عوج ولا عديل بس خلينى أنا بعيد عن البيت ده علشان مش برتاح وانا بفرج الناس عليه قلبى بيبقى مقبوض.
حازم هعطيك عموله كويسه.
فتحى الله الغنى يا اخى سيبنى فى حالى يلا ومن غير سلام.
حازم هو الواد ده عبيط ولا إيه ؟
ورجع بعقله لثلاث سنوات ماضين.
فلاش باك
حازم عامل إيه يا عمر ؟
محمد الحمد لله ياابن اخوى.
حازم مش هتجوزنى بنتك زى ما وعدتنى يا عمى ؟
محمد والله يا ابنى موضوع الجواز ده بالذات مش بحب اغصب عليها فيه أنا عارف أنى وعدتك بس لما عرضت عليها الموضوع رفضته وقالت أنك زى أخوها.
حازم بس أنا مش اخوها يا عمى طب سيبنى اقعد معاها اقنعها.
محمد معلش يا ابنى مش عايز اغصب عليها فى حاجه كل شئ قسمه ونصيب.
حازم بغضب مكتوم ماشى يا عمى ما يجرش حاجه. عن أذنك همشى بقى.
محمد اتفضل يا ابنى مع السلامه.
حازم راح قعد على الترعه وفضل يفكر يعنى مال عمى وبيته واراضيه هتروح لناس غريبة علشان السنيورة بتدلع ده أنا اخربها فوق رأسهم بس أعمل إيه؟
لقيتها خلاص هقوم دلوقتي يدوب أوصل القرية اللى جنبنا.
بعد نص ساعه بالسيارة.
حازم وصلت المكان المطلوب كان عبارة عن بيت قديم من دور واحد بس وأول ما وصلت لقيت زحمه كبيرة وريحة البخور جامدة بس المكان مقبض أوى لدرجة ترعب بس هخلص مصالحتى وامشى قعدت بعد لما اخدت دور بس كان لسه فاضل كتير وكده مش هينفع مش عايز حد يلاحظ غيابى.
قمت وروحت للست اللى بدخل الناس كرمشت لها خمسين جنيه فى أيدها وقلتلها أنى مستعجل ورجعت قعدت مكانى بعد شوية لقيتها شاورتلى علشان أقوم وامشى وراها لحد لما دخلت للشيخ عرفه أو الدجال لأنه كان مخاوى جن بس هما بيقولوا عليه شيخ وأول ما دخلت عنده شاورلى علشان أقعد قعدت وطلب منى اغمض عيني.
غمضت عيني.
قالى عايز ايه بالظبط ياحازم.
سحر محبه علشان توافق عليك بنت عمك.
حازم لا مش عايز سحر محبه.
الشيخ عرفه بابتسامة اومال عايز ايه ؟
حازم جنون
الشيخ هتدفع..........
حازم أنت تؤمر.
الشيخ بس عايز حاجه تكون لمستها أو استخدمها.
حازم هحاول اجيبلك حاجه .
الشيخ طب لما تجيبها وتجيب اللى قولتلك عليه هنفذ المطلوب.
حازم تمام همشى أنا علشان الحق أوصل.
بعد ثلاث ايام.
حازم جبت المطلوب ياشيخ عرفه.
عرفه بابتسامة أخد الحجاب وقطر عليه بعد نقط دم وحرقه جزء منه واخد الرماد وجاب ورقه وكتب عليه شوية كلمات مش مفهومه وطوها وهو بيتمتم بكلمات واعطنى لفه وقال ادفنها تحت عتبة بيتهم وهتلاقى كل اللى أنت عايزه.
حازم متشكر ياعم الشيخ.
روحت قبل الفجر بنص ساعه والناس نايمه حفرت قدام بيت عمى ودفنت العمل.
ورجعت بيتى ولا كأنى عملت حاجه وبطلت أتردد على بيت عمى.
لحد ما لقيته بيتصل بيا.
حازم الوو خير ياعمى فى ايه؟
محمد الحقنى ياابنى مش عارف بنتى مالها بتعمل حاجات غريبة.
حازم مالها ياعمى.
محمد على طول بسمعها بتكلم نفسها وبليل بتفضل تخبط وترزع ولقيتها بتخبط رأسها في الحيط. مش عارف أعمل ايه ؟
حازم تعالى ناخدها لدكتور فى البندر ونشوف عندها إيه.
محمد طيب يا ابنى يلا تعالى على بال ما نجهز علشان نسافر بيها.
حازم مسافة السكه يا عمى
روحنا لدكتور فى البندر وقال ممكن يكون اكتئاب وكتب لها على ادواية بس الموضوع كان بيتطور عندها لحد ما القرية كلها عرفت بجنانها.
وفى يوم كنت رايح اشوف الزرع وأنا ماشى من قدام بيت عمى لقيت الناس كلها ملمومه روحت أشوف فيه إيه لقيت بنت عمى غرقانه في دمها وعمى قاعد جنبها على الأرض بيبكى.روحت أجرى على عمى وبقوله فى إيه يا عمى إيه اللى حصل.
عمى بيبكى بس مش بيقول حاجه حاولت اقومه من جنبها بس مفيش فايده كان قاعد حاضنها وبيبكى.
جات الشرطة والاسعاف وتبين الوفاة نتيجة سقوط من اعلى مفيش أى شبه جنائية.واتقفل الموضوع على كده.
وعملنا العزاء وفضلت مع عمى فى بيته يومين العزاء بس كانت بتحصل حاجات غريبة .
كنت بشوفها بتنحرك جوه البيت.كنت هتجنن ازى موجودة فى البيت وأحنا لسه دفننها.
وكل لما عينى تغفل أسمع صوتها بتصرخ وبتضحك وبتتكلم.
هما يومين واستاذنت من عمى ورجعت بيتى.
كنت كل يوم وأنا راجع من الغيط بعدى على عمى علشان اطمن عليه ما أصله عايش لوحده بعد موت مراته وبنته.
وكنت واخد مفتاح علشان لو ما رديش افتح وأدخل وفى يوم وأنا بعدى عليه ما فتحش الباب فتحت ودخلت لقيته نايم ومش بيتحرك.جريت على المستوصف جبت الدكتور وقال إنه مات بأزمة قلبية.
الناس فضلت تقول إنه من زعله على بنته حصلها.
بس محديش يعرف إيه اللى حصل.
باك....
عدا سنه على موت عمى وبنته وطبعاً أنا الوريث لكل حاجه مهو مالوش حد غيرى.
عملت إعلام وراثة وبقيت كل أملاك عمى بتاعتى رسمى.
شوفت بنت حلوة من البلد واتجوزتها مهو أن الأوان أنى أعمل عائلة بقى.
واتجوزت والدنيا تمام وبحاول أبيع بيت عمى بس كل اللى يشتريه يرجع يسترد فلوسه ويقولى فيه عفاريت .
مش عارف أعمل إيه وحاسس جسمى مكسر بقالى فترة حتى شغل الزراعه ما عدتش قادر عليه زى الأول جبت انفار تشتغل فى الأرض باليومية.
وفجاءة جسمى حط خالص وبقيت كيف المشلول في السرير
مراتى كانت بتهتم بيا وتاكلنى وتعطينى الأدوية لحد فجأة بقت تتعامل معايا بدون رحمه وتزعق فيا وتشتمنى وأنا كنت حرفياً مشلول ولا بقدر أتكلم ولا بقدر أتحرك. وعلى الرغم أنى مشلول بس كنت بسمع كل حاجه.
فى يوم بليل وأنا نائم على السرير سمعت مراتى بتتكلم مع وأحد بتقوله العمل ما عملش نتيجة غير أنه اتشل هيموت أمنى علشان نورثه أنا زهقت منه.
سمعت صوت اللى بيرد عليها وهنا كانت صدمتى كان فتحى صاحبى هو اللى معاها.بيقولها الشيخ قال هياخد وقت يفضل مشلول وبعدين يموت علشان توريثه .
لقيتها بتقوله أنا زهقت منه إحنا كنا متفقين اتجوزه واخليه يكتبلى كل حاجه وبعدين نخلص منه بس طلع إبن ابالسه حريص ما رديش يكتبلى حاجه.
هو اللى اتضطرنى اعملوا سحر خليه بقى لما يموت ونخلص منه.
فتحى خلاص ما ترغبش كتير ومش هنتقابل غير بعد لما يموت وتورثى هجى اطلبك من أهلك.
فردوس ماشى سايبنى اشيل أنا الراجل المقرف ده وهتيجى أنت على الجاهز.
فتحى مش مسألة تشيلى واشيل بس ما ينفعش أظهر فى الصورة هيطلع كلام كتير عليكى إحنا فى غنا عنه.
فردوس خلاص اتكل أنت دلوقتي لحسن المصيبة اللى جوه يصحى.
فتحى سلام يا جميل.
مر يومين ولقيت فردوس بتبص لى بغيظ وهى بتبكى وتقول ياريتك كنت أنت اللى موت ياريتك كنت أنت.
ومن رغيها مع أختها عرفت أن فتحى بعد لما خرج من عندها اتلموا عليه قطاع طرق وسرقوا اللى معاه وقتلوا.
وهى عماله تندب حظها.
المشكلة أن بنت المعاتيه.زعلت على حبيب القلب قررت تنتحر طب وأنا مالى تاخدنى معاها ليه.
رحت مغرقة البيت جاز وولعت فيه.
الناس شافوا النار بلغوا الشرطة والمطافى والاسعاف.
على بال ما دخلوا البيت كان اتفحم وهى ماتت وأنا حالتى ما بين الحياة والموت.بس قررت اقول للناس قبل ما اموت أن طريق الحرام آخره وحشه.
خليت الممرضه تسجل كلامى وتبعته لأى حد ينشره علشان الناس تتعظ وما تطمعاش فى حاجه مش بتاعتها واهو كل اللى لجأ للسحر كان نهايته الهلاك.
﴿ مَا عِندَكُمْ يَنفَدُ ۖ وَمَا عِندَ اللَّهِ بَاقٍ ۗ وَلَنَجْزِيَنَّ الَّذِينَ صَبَرُوا أَجْرَهُم بِأَحْسَنِ مَا كَانُوا يَعْمَلُونَ﴾
#الهام_احمد_عبدالحليم_نيروزونيارنيار. ❝ ⏤إلهام احمد عبد الحليم (نيروزونيارنيار)