ستيوارت دجوناثان راسل (مزيود ف 1962) أنفورماتيسيان معروف ب لمساهمة لكبيرة ديالو ف لمجال ديال الدكا لإصطناعي. هوّ أستاد ديال لانفورماتيك ف جامعة كاليفورنيا، ف بيركلي، و مؤسس و مدير ديال مركز الدكا لإصطناعي لمتوافق معا بنادم. راسل ساهم (معا پيتر نورڤيڭ) ف تأليف واحد من أشهر لكتوبا د لقراية ديال الدكا لإصطناعي ب النڭليزية لي هوّ Artificial Intelligence: A Modern Approach لي مخدم ف كتر من 1500 جامعة ف 135 بلاد.

حياتو[بدل | بدل لكود]

ستيوارت راسل تّولد ف پورتسموث ف النڭليز. قرا ف مدراسة لقديس پول ف لندن، و من بعد مشا يقرا لفيزيك ف لافاك ديال وادهام كوليدج، لي تابعة ل جامعة ؤكسفورد، و خدا الليصونص ديالو ف 1982. مشا موراها ل لميريكان باش يدير الدوكتورا ف تاحسوبيت ف جامعة ستانفورد.^[1]

خدا عدد د لمناصب لفعلية و لفخرية، منها أستاد ف جامعة كاليفورنيا، و "صاحب فخري" Honorary Fellow ف وادهام كوليدج.

لأبحات ديالو كاتدخل ف بزاف د لمجالات لفرعية د لانفورماتيك منها التعلام لماكيني، اللوجيك لإحتمالية، الشوفان لحواسبي، و غيرهوم.

ف 2016، أسس مركز الدكا لإصطناعي لمتوافق معا بنادم معا باحتين خرين، لي لهدف ديالو لحد من لمخاطر ديال الدكا لإصطناعي. راسل عضو ف لمجلس لإستشاري لعلمي ديال معهد موستقبال لحياة، و ف لمجلس لإستشاري ديال مركز دراسة لمخاطر لوجودية.

راسل عندو عدد لكتوبا ألّفهوم، و ساهم ف إنتاج وتائقيات، و بان ف التلفازة باش يهضر على مواضيع ف التخصص ديالو شحال من مرة. و خدا عدد د الجوايز، بحال جايزة لمؤتمر الدولي لمشتارك على الدكا لإصطناعي د لورديناتور و لفيكر ف 1995. ف 2021، خدا وسام رتبة لإمبراطورية لبريطانية. و ف 2022، خدا جايزة التفوق ف لبحت من لمؤتمر الدولي لمشتارك على الدكا لإصطناعي د لورديناتور و لفيكر باش يكون تاني شخص كياخد الجوايز ديال هاد لمعهد بجوج. عندو عدد د الجوايز و التشريفات خرين.