˝قطقوطة ˝ يا سيده الجمال إذا أطلقتي سهمكي نحوي سأكون... 💬 أقوال الكاتبة/ أسماء إسلام مرعي 📖 كتاب يومياتي

❞ Part1
- عموماً أنا هنا ، أحنا صحاب !

- صحاب بس يا ملاك ؟

-تشرب قصب ؟ ولا تحب نشرب قهوة وتحكيلي مالك .

-بتتهربي ؟

إبتسمت وقولتله - يبقي تشرب قهوة وتحكيلي

روحنا الكافيه وقعدنا

بدأ يتكلم ونبرة صوته حزينه
-قولتيلي خد اللي بتحبك واللي بتحبك هتخليك غصب عنك تحبها مع الوقت بسبب حبها ليك حصل؟.

-حصل

-أنا حاولت بكُل الطرق معرفتش أحبها أنا ظلمتها وأنتِ عارفه إني بحبك أنتِ !

-انا معملتش حاجه تخليك تحبني ده أنا بعدت عنك من وقت ما أرتبطت بيها وقبلها كنت متجنباك .

-أنتِ مقولتليش سبب مقنع يخليني أكرهك

-أنا هأذيك ده سبب مش كافي ؟ أنا أي حد هحبه او أتعلق بيه هو مصدر خطر عليا أنا مينفعش أقع في الحب
لما بقع ببقي ضعيفة ، أنا مينفعش أبقي ضعيفة.

-أنا مش مقتنع ده مش سبب كافي حاسس إنك مخبيه حاجه تانيه أنتِ بقالك فترة متغيرة !

إرتبكت وبصيت الناحية التانية - هخبي اي يابني قولت كل اللي عندي

-بس انا عارف أنك بتحبيني ..و

-زي أخويا بحبك زي أخويا ياحسن

- ده أخر كلام عندك؟

قومت من مكاني هزيت دماغي ومشيت
وأنا قلبي متفتفت من الحزن ، مفيش أبشع من أنك تقرر تنكر حبك لشخص عايزك وشاريك... عشان ميتأذيش

أنا عرفت مؤخراً إني عندي مشكلة ومش هقدر أخلف واجيب عيال زي ما كان نفسي وزي مابنيت أحلامي

وحسن ميستاهلش مني ده هو من حقه يكون أب وانا مش هنفعله ف حاجه أكيد هيعوز يعمل عيلة وأولاد

انا اصلا حبيت حسن قبل ما هو يحبني لما اعترفلي انا فضلت أعيط أعيط من الفرحة ومن الحزن !

يعني وقت ما يعترفلي اكون عرفت بالخبر ومن وقتها قررت اغير معاملتي بل وكمان أخليه يتعرف علي بنات لحد ماعرف أميرة بنت جميله وبنت ناس انا بحبها وعوزاه يتجوزها عشان ينساني...بس مش قادره أتقبل إنه يبقي مع واحدة غيري والله طب يارب أعمل
قعدت على الرصيف وفضلت أعيط ..
___
وفضلت شهور قاطعه كلام معاه وبراقبه من بعيد ..لحد ما جاتلي مكالمة منه اول لما شوفت أسمه علي تليفوني رجعت أضحك زي ما اكون كنت مستنياها طلعت مش بتجاوز طلعت براكم .
-عاملة إيه يا ملاك ؟
- أنا تمام وأنتَ؟
- بخير الحمدلله
- أنا عايزة أتكلم معاكي في موضوع
توقعت إنه هيفتح الموضوع تاني وبصراحه المرادي كنت هقوله الحقيقة واقوله إني بحبه.
- انا كمان عايزة اقولك علي حاجه
أستغرب وقالي - طيب قولي
-لا لا انت الأول
-ماشي ياستي
أحنا حددنا معاد الفرح أنا وأميرة هيكون الجمعه الجاية إن شاء الله هستناكي تنوريني هبقي أبعتلك اللوكيشن مستنيكي
برقت بصدمة والدموع نزلت شلال من عنيا
-فرحك أنتَ وأميرة!!
#ملاك
#أسماء_مرعي
#حكاوي_قطقوطة
#بنت_المنصورة. ❝ ⏤الكاتبة/ أسماء إسلام مرعي