📘 ❞ باندا ❝ ديوان ــ عمرو حسن اصدار 2016

❞ زي مج كاكاو قديم على رف بارد من رخام
زي سرب من الحمام فقد الديار
زي المطر في إزار فيميه
أو زي سهم بينطلق ناحية هدف
ما اعرفش هو اللي اتحدف
ولا بإرادته اختار ما بين أحلام بديلة
زي باندا
أو أقل قليلا ..
....
رتب صحابك ع الورق
حسب الوجود وقت الألم
واعمل خطوط تحت الي فاضل منهم
تحت اللي لسه بيفهمك ويكلمك
تحت اللي لما بتنسي هو يفكرك
تحت اللي غاوي يقدرك
وإن كنت عاجز يحضنك . ❝

❞ لو عاوز شئ بشده
اعمل حواليه قوسين
خلى عيونك تحاوطه
لو حتى يروح لفين
خليك فاهم يا صاحبى
الحلو بييجى مرة
ومفيش فى الدنيا فرصة
تتكرر مرتين . ❝

❞ وبكره يجوز تقابليني ف اي مكان، هشوفك وقتها دخان . ❝

❞ تصبحى على نفسك لقياها من غير ولا حزن ولا متاهه بتبصى لبكره بعين حرة ومصره تداوى جراح ماطابتش مش فاكره الحدوته المرة عن واحدة تحب وماتحبتش ومذاكرة التفاصيل الكامله لحاجات دومتيلها لكن مادمتش . ❝

❞ تقوللي ايه العلاقة مابين دخول الشتا
وبين الدخول ف الاكتئاب
اسكت..
شالوا الهدوم الصيفي م الدواليب
قفلوا البيبان
واتبدلت مشاريب خفيفة بمشروبات سخنه
وانا انكمشت كاني قنفد خام
فيه عطل ف الأيام خلانا نتذّكر...
أو عطل ف الحواديت خلانا بنفكّر ..
ف حاجات كسرها الزمن ورمانا مطرحنا
الغلطة مش ف الشتا
!!الغلطة فينا احنا . ❝

❞ بتحب ليه السيما!
اسأل محمد خان...
واسأل صبي حبها واداها روحه، اتخان
بتحب ليه الشتا؛
اسأل بقى الدخان
واسأل خيوط الصوف في البالطو هتقولك:
(لولا الشتا يا صديق كنا اتحرقنا حريق)
لولا السجاير والغنا والبُن
كنا صبحنا حطام
أو صنف من أصنام مصنوعة بالعجوى
ولولا - أحمد زكي وسناء جميل - مثلًا
كنا صبحنا حديد
أو علبة اسطوانات
لكن لحزن الحسن والخبطات
ربك جعلنا غلابة بالفطرة
علشان كده كل اما اجرّب الانتحار بافشل
وبتدخلوا الأوضة وانا باقول اكشن
فبتحسبوا المشنقة من جهلكوا فيونكة
ودي .. مش فيونكة . ❝